Font Size Smallest Small Medium Big Biggest

ਪੜ੍ਹਨਾ ਲਿਖਣਾ ਵੱਸ ਦੀ ਗੱਲ ਨਹੀਂ
ਮੰਚ ‘ਤੇ ਗੱਲਾਂ ਕਰ ਲੈਂਦਾ ਹਾਂ
ਮੈਂ ਲੋਕਾਂ ਦਾ ਆਗੂ ਹਾਂ ਜੀ
ਸਭ ਨੂੰ ਮੂਹਰੇ ਧਰ ਲੈਂਦਾ ਹਾਂ ।

ਭਲਾ ਸਿਆਸਤ ਮੈਂ ਕੀ ਜਾਣਾਂ
ਇਹ ਤੇ ਡੂੰਘਾ ਸਾਗਰ ਹੈ ਜੀ
ਗੋਡੇ ਗੋਡੇ ਪਾਣੀ ਵਿਚ ‘ਪਰ
ਔਖਾ ਸੌਖਾ ਤਾ ਲੈਂਦਾ ਹਾਂ ।

ਥੌੜ-ਦਿਲਾ ਜੇ ਮੱਥਾ ਲਾਵੇ
ਉਸਦਾ ਨੱਕ ‘ਚ ਦਮ ਕਰ ਦਿਆਂ
ਜੇ ਕੋਈ ਡਾਹਡਾ ਟੱਕਰ ਜਾਵੇ
ਉਸਦਾ ਰੋਹ ਮੈਂ ਜਰ ਲੈਂਦਾ ਹਾਂ ।

ਨਾਮ ਕਮਾਉਣਾ ਕਿਹੜਾ ਔਖੈ
ਝੰਡਾ ਚੁੱਕ ਲੳ, ਨਾਅਰੇ ਲਾ ਲੳ
ਬਲਦੀ ‘ਤੇ ਕੁਝ ਤੇਲ ਪਾ ਦਿੳ
ਮੈਂ ਇਹ ਸੌਖੇ ਕਰ ਲੈਂਦਾ ਹਾਂ ।

ਸਾਰੇ ਗੁਰ ਮੈਂ ਸਿੱਖ ਗਿਆ ਹਾਂ
ਕੀ ਕੁਝ ਲੈਣੈ, ਕੀਕਣ ਲੈਣੈ
ਵਗਦੀ ਗੰਗਾ ਵਿਚੋਂ ਹੁਣ ਮੈਂ
ਆਪਣੀ ਗਾਗਰ ਭਰ ਲੈਂਦਾ ਹਾਂ ।

ਚੌਧਰ ਤੇ ਹੁਣ ਮੁੱਲ ਵਿਕਦੀ ਹੈ
ਪੈਸਾ ਖਰਚੋ, ਚੌਧਰ ਲੈ ਲੳ
ਪੈਸਾ ਸਾਡੇ ਕੋਲ ਬਹੁਤੇਰਾ
ਮੈਂ ਵੀ ਸੌਦੇ ਕਰ ਲੈਂਦਾ ਹਾਂ ।

ਸਭ ਤੋਂ ਵੱਡਾ ਧੜਾ ਏ ਮੇਰਾ
ਹਰ ਥਾਂ ਬੰਦਾ ਖੜਾ ਏ ਮੇਰਾ
ਜੇ ਕੋਈ ਉੱਚੀ ਸੁਰ ਵਿਚ ਬੋਲੇ
ਉਸਦੀ ਖੂਬ ਖਬਰ ਲੈਂਦਾ ਹਾਂ ।

ਪੜ੍ਹੇ ਹੋਣ ਦੀ ਲੋੜ ਵੀ ਕੀ ਏ
ਲੇਖਕ ਲਿਖਦੇ ਨੇ ਮੇਰੇ ਲਈ
ਜਿਨ੍ਹਾਂ ਉੱਤੇ ਉਹ ਵਰ੍ਹਨ ਨੂੰ ਆਖਣ
ਮੈਂ ਉਹਨਾਂ ‘ਤੇ ਵਰ੍ਹ ਲੈਂਦਾ ਹਾਂ।

---